नेपाल आयल निगमले पेट्रोल, डिजेल र मट्टितेलको मूल्य प्रतिलिटर ५ रुपैयाँ बढाउने निर्णय गरेको छ । यससँगै काठमाडौँ उपत्यकामा पेट्रोलको मूल्य प्रतिलिटर १५० रुपैयाँ पुगेको छ भने डिजेल र मट्टितेलको मूल्य प्रतिलिटर १३३ रुपैयाँ पुगेको छ।
अन्तर्राष्ट्रिय बजारमा कच्चा तेलको मूल्यमा भारी बढोत्तरी भइरहेको सन्दर्भमा निगमलाई प्राप्त मूल्यसूचीको आधारमा हाल प्रचलनमा रहेको पेट्रोलियम पदार्थको स्वचालित मूल्य प्रणालीअनुसार मूल्य वृद्धि गरिएको निगमको भनाइ छ ।
निगमका सहप्रवक्ता पुष्कर कार्कीका अनुसार निगमलाई एलपी ग्यासमा समेत प्रति सिलिन्डर रू ६६५.३४ रुपैयाँ घाटा भएपनि विक्री मूल्य बढाइएको छैन । तर, हवाई इन्धनमा भने केही मूल्य समायोजन गरिएको छ ।
मूल्य समायोजनपछि पनि निगमको १५ दिनको घाटा करिब २ अर्ब ५० करोड घाटा यथावत नै रहने निगमको भनाइ छ ।
