सिरहा । सिरहाको धनगढीमाई नगरपालिका-९ मुसहर्नियास्थित पूर्वपश्चिम राजमार्गमा टिपरले विङ्गरलाई ठक्कर दिएको छ । पश्चिमबाट पूर्वतिर जाँदै गरेको ना १ आ १६४ नम्बरको टिपरले पूर्वबाट पश्चिमतिर आउँदै गरेको ना १ ज ६४३८ नम्बरको विङ्गरलाई ठक्कर दिएको हो ।
मंगलबार सवा तीन बजेको समयमा अत्यधिक गतिमा गुडिरहेको टिपर अनियन्त्रित भएर विङ्गरलाई ठक्कर दिएको प्रत्यक्षदर्शीले बताएका छन् । विङ्गरमा करिब २० जना यात्रु सवार थिए ।
त्यसमध्ये अधिकांश यात्रु घाइते भएका छन् । पाँच जनालाई भने बढी चोट लागेको प्रहरीले जनाएको छ । प्रहरीका अनुसार उनीहरूको दुर्घटनास्थल नजिकैको अस्पतालमा उपचार भइरहेको छ ।
टिपर र विंगर दुवै सवारीचालक भने घटनालगत्तै फरार भएको र उनीहरूको खोजीकार्य भइरहेको जिल्ला प्रहरी कार्यालय सिरहाका प्रहरी प्रवक्ता डीएसपी मुक्तिनाथ सापकोटाले जनाए ।
