शिक्षा /स्वास्थ्यसमाचार
Trending

‘फाइजर खोप बालबालिकालाई’

१२–१७ उमेर समूहका लागि मुलुकमा खोप नरहेकाले संक्रमण भए मृत्युको जोखिम बढ्ने

ADVERTISEMENT
ADVERTISEMENT

काठमाडौँ । विश्व स्वास्थ्य संगठन (डब्लूएचओ) को कोभाक्स सुविधाअन्तर्गत प्राप्त हुने १ लाख ६ सय २० डोज फाइजर खोप १२ देखि १७ वर्षसम्मका दीर्घरोगी बालबालिकालाई दिन विज्ञहरूले सुझाव दिएका छन् ।

ADVERTISEMENT

स्वास्थ्य तथा जनसंख्या मन्त्रालयले भने यो खोप ५५ वर्षमाथिका दीर्घरोगी भएका र सुपर स्पेसलाइज्ड (अति विशिष्ट) अस्पतालमा प्रयोग गर्ने तयारी थालेको छ । ५५ वर्षमाथिका दीर्घरोगीलाई हाल उपलब्ध खोपले नै यथोचित सुरक्षा प्रदान गर्ने तर्क विज्ञहरूको छ ।

१२–१७ वर्ष उमेर समूहका लागि हाल मुलुकमा खोप नरहेको र संक्रमण भए मृत्युको जोखिम बढी रहने बीपी कोइराला स्वास्थ्य विज्ञान प्रतिष्ठान धरानका बालरोग विभाग प्रमुख डा. प्रकाश पौडेलले बताए । ‘५५ वर्षमाथिकाले फाइजर लगाउनु एक प्रकारले खेर जानु हो,’ उनले भने, ‘दीर्घरोग भएका बालबालिकामा उपयोग गरेर उनीहरूको ज्यान जोगाउनुपर्छ ।’ उनका अनुसार कुनै औपचारिक अध्ययन नभए पनि अस्पताल आउनेमध्ये करिब ५ प्रतिशत बालबालिकामा दीर्घरोग देखिएको छ । उनीहरूमा दमको समस्या बढी भएकाले कोभिड हुँदा भेन्टिलेटरमा जाने जोखिम बढी रहने चिकित्सक बताउँछन् । खोप प्राप्त हुने चरणमै रहेकाले बालबालिकालाई नै दिए बुद्धिमानी हुने कान्ति बाल अस्पतालका निर्देशक डा. अजित रायमाझीको भनाइ छ ।

डा. पौडेलका अनुसार एचआईभी/एड्स, क्यान्सर उपचारअन्तर्गत किमोथेरापी लिइसकेका, मुटुको समस्या भएका, मिर्गौलाका दीर्घरोगी, मधुमेह भएका दीर्घरोगी बालबालिकालाई फाइजर दिए कोभिडको जोखिमबाट केही हदसम्म जोगाउन सकिन्छ । स्वास्थ्य सेवा विभाग बाल स्वास्थ्य तथा खोप शाखा प्रमुख सागर दाहालले भने फाइजर खोप सबै बालबालिकालाई दिन सक्ने अवस्था नभएकाले ५५ वर्षमाथिका दीर्घरोगीलाई दिने तयारी थालिएको बताए ।

अस्ट्राजेनेका, भेरोसेल र जोन्सन गरी हालसम्म १ करोड ७७ लाख ५५ हजार ५ सय ९० डोज खोप प्राप्त भएको छ । सरकारले बालबालिकाका लागि मोडर्ना र फाइजर गरी एक करोड डोज खोप ल्याउने प्रक्रिया थालिसकेको छ । मन्त्रालय स्रोतका अनुसार ती दुवै खोप सन् २०२२ को मार्चसम्ममा नेपाल आइसक्नेछ । खरिद गर्न लागिएको फाइजरको ६० लाख डोजभन्दा पहिले नै कोभाक्स सुविधाअन्तर्गत एक लाख ६ सय २० डोज आउने निश्चित भइसकेको छ । सरकारले यो खोप भण्डार गर्न चार वटा शून्यभन्दा ८० डिग्री सेल्सियस कम तापक्रममा राख्न मिल्ने ‘अल्ट्रा लो टेम्परेचर स्टोरेज’ क्षमता भएको फ्रिज ल्याइसकेको छ । ‘तापक्रम नियन्त्रित ‘थर्मल सिपर्स’ बाट फाइजर आउँछ, हामी उक्त ‘सिपर्स’ बाट अल्ट्रा लो टेम्परेचर स्टोरेजमा खोप भण्डारण गर्नेछौं,’ दाहालले भने । खोपलाई प्रयोग गर्ने बेला २ देखि ८ डिग्री सेल्सियसको तापक्रममा राखिनेछ ।

खोप आउने निश्चित भएपछि औषधि व्यवस्था विभागले केही दिनअघि शून्यभन्दा कम तापक्रममा भण्डारण गर्नुपर्ने फाइजर र मोडर्नालाई आकस्मिक उपयोगका लागि अनुमति दिएको वरिष्ठ औषधि व्यवस्थापक सन्तोष केसीले बताए । मन्त्रालय स्रोतले दुई महिनाभित्र खोप आइसक्ने दाबी गरेको छ । सोमबारसम्म १८ वर्षमाथिका ६२ लाख १५ हजार ८ सय ५६ जनाले पहिलो डोज र ५५ लाख ८८ हजार ५ सय १७ जनाले पूर्ण खोप लिइसकेका छन । एक डोज मात्र लिनेको संख्या १ करोड १८ लाख ४ हजार ३ सय ७३ पुगेको छ ।

ADVERTISEMENT

ADVERTISEMENT

अपन दैनिक न्युज डेस्क

लोकतन्त्र स्थापना र सुशासन प्रत्याभूति गराउन कहिल्यै कसैसँग सम्झौता गर्ने छैन । [email protected] फाेन नम्बर +977-033-521214

Leave a Reply

Your email address will not be published. Required fields are marked *

Back to top button