काठमाडौँ । नेकपा माओवादी केन्द्रले स्थानीय चुनावमा घात गर्नेलाई कारबाही गर्ने भएको छ । स्थानीय तह निर्वाचनमा पार्टीभित्र भएका घात, प्रतिघात र असहयोगबारे केन्द्रीय समितिद्वारा गठित छानबिन कार्यदलले निलम्बन, निष्काशन र चेतावनीसम्मको कारबाही सिफारिस गरेको हो ।

सोमबार कार्यदलका अध्यक्ष टंक राईले पार्टी अध्यक्ष पुष्पकमल दाहाललाई प्रतिवेदन बुझाएका छन् । उक्त कार्यदलमा मुक्ति प्रधान र खिमलाल देवकोटासमेत थिए ।

अध्यक्ष दाहालले कार्यदलले चुनावमा घात गर्ने र अनुशासन तोड्नेलाई ‘निलम्बन, निष्काशन र चेतावनी’को सिफारिस गरिएको जानकारी दिए । कार्यदलले तयार पारेको प्रतिवेदनले माओवादीलाई मात्र नभई अन्य दललाई पनि विधिसम्मत तरिकाले चल्न सन्देश दिने उनले दाबी गरे ।

उनले भने, ‘कार्यदलले बिनापूर्वाग्रह काम गरेको छ । यसले पार्टीलाई अनुशासित बनाउनका लागि मद्दत गर्नेछ । यसले हाम्रो पार्टीलाई मात्र होइन अन्य पार्टीलाई पनि केही न केही सन्देश दिन्छ । देशमा राजनीतिलाई सही ढंगले अगाडि लैजान मद्दत गर्छ ।’