सिमरा । साबिक विजेता चर्च ब्वाइज युनाईटेड क्लबलाई इन्जुरी समयमा स्तब्ध पार्दै सलहेश युवा क्लब सिरहा जगदम्बा स्टिल १४ औँ जीतपुरसिमरा गोल्डकपको सेमिफाइनलमा प्रवेश गरेको छ ।
आइतबार राति सिमरा रङ्गशालामा भएको प्रतिस्पर्धात्मक खेलको अन्तिम समयमा गोल गर्दै सिराहाले ‘ए’ डिभिजन क्लब चर्च ब्वाइज विरुद्ध ३–२ को रोमाञ्चक जित दर्ता गर्यो । खेलको १४ औँ मिनटमा सिरहाका लागि आशिष चापाँगाईले गोल गर्दै अग्रता दिलाएका थिए ।
पहिलो हाफ आफ्नो पक्षमा पारेको सिरहा विरुद्ध चर्च ब्वाइजले खेलको ५१ औँ मिनटमा बराबरी गोल गर्यो । चर्च ब्वाइजका राजेश परियारले बराबरी गोल गर्दै टिमलाई खेलमा फर्काए पनि केही बेरमै आत्मघाती गोलका कारण चर्च ब्वाइज पुनः २–१ गोल अन्तरले पछाडि पर्यो । चर्च ब्वाईजका डिफेण्डर एकराज बुढाथोकीले बल क्लियर गर्न खोज्दा गरेको गल्तीले बल गोलमा परिणत भएको थियो । खेलको ६३ औँ मिनटमा आत्मघाती गोलका कारण चर्च ब्वाइज पुनः पछि परेको थियो ।
अनुभवी खेलाडीले भरिएको चर्च ब्वाइजले पनि आत्मघाती गोलको फाइदा लिँदै बराबरी गर्यो । खेलको ७३ औँ मिनटमा सिरहाका कप्तान कुलदिप कार्कीले गोल लाइनबाट क्लियर गर्न खोजेको बल गोलमा परिणत हुँदा चर्च ब्वाइज खेलमा फर्किएको थियो ।
अन्तिम समयमा भएको बराबरीपछि निर्धारित समयमै खेल आफ्नो पक्षमा पार्न दुबै टिमले आक्रामक खेल खेलेका थिए । तर इन्ज्युरी समयको अन्तिम मिनटमा गोल गर्दै सिरहाले चर्च ब्वाइजलाई स्तब्ध बनायो । सिरहाका लागि शिशिर लेखीले दोश्रो हाफको ५ मिनटको इन्जुरी समयको अन्तिम मिनटमा गोल गरेका थिए ।
खेलको म्यान अफ दी म्याच सिरहाका शिशिर लेखी घोषित भए । उनले १० हजार नगद सहित ट्रफी प्राप्त गरे । प्रतियोगिता अन्तर्गत सोमबार सशस्त्र प्रहरीको नेपाल एपीएफ क्लब र मकवानपुर ११ हेटौँडा बिच खेल हुनेछ ।
