नेकपा एमाले निकट युवा संघ नेपालले प्रधानमन्त्री शेरबहादुर देउवा र भौतिक पूर्वाधार तथा यातायात मन्त्री रेणु यादवको पुतला दहन गरेको छ । सो संगठनले आइतबार जनकपुरधाममा प्रधानमन्त्री देउवा र मन्त्री यादवको पुतला दहन गरेको हो ।
जनकपुरधामस्थित रेल्वे स्टेसनबाट निस्केको जुलुसले जनकपुरधाम नगरको परिक्रमा गरेको थियो । मन्त्री यादवले हिंसात्मक अभिव्यक्ति दिएपनि प्रधानमन्त्री देउवाले उनलाई बर्खास्त गर्न नचाहेको र स्थानीय तहको निर्वाचनको मिति घोषणा गर्न ढिलाइ गरेकोले उनीहरुको पुतला दहन गरिएको युवा संघले जनाएको छ ।
यूवा संघका कार्यकर्ताहरूले नरसंहारवादी मुर्दावाद, रेणु यादवलाई मन्त्री पदबाट बर्खास्त गर, हत्यारा सरकार चाहिँदैन, मापसे सरकार मुर्दावाद, स्थानीय तहको निर्वाचनको मिति घोषणा गर, अपराधी देउवा सरकार मुर्दावाद जस्ता नारासमेत लगाएका थिए ।
माघ ५ गते रौतहटको गौरमा आयोजित एक कार्यक्रममा बोल्दै मन्त्री यादवले हिंसात्मक अभिव्यक्ति दिएकी थिइन् । त्यस्तै एमाले निकट अनेरास्ववियूका कार्यकर्ताले जनकपुरधाममा पेट्रोलियम पदार्थको मूल्य वृद्धि गरेको विरोधमा समेत प्रदर्शन गरेका छन् ।
