रौतहट । कटुवा पेस्तोल र गोलीसहित रौतहटबाट चार जना युवकलाई प्रहरीले पक्राउ गरेको छ । पक्राउ पर्नेमा दुर्गा भगवती गाउँपालिका २ का २४ वर्षका सञ्जय साह सोनार, सोही वडाका वर्ष २८ का संजिव महतो ,वडा १ का वर्ष १९ का राजेश कुमार चौधरी ,र गढीमाई ६ का दिनेश महरा रहेका छन् ।
जिल्लाको दुर्गाभगवती गाउँपालिका–२, भलोहिया गाउँ घर भएका २४ वर्षीय सञ्जय साह सोनारको घर खानतलासीको क्रममा एकथान कटुवा पेस्तोल र दुई थान गोली बरामद भएको प्रहरीले जनाएको छ ।
जिल्ला प्रहरी कार्यालय र इलाका प्रहरी कार्यालय गंगापिपराबाट खटिएको प्रहरीले घर तलासी गरि उक्त हतियार तथा गोली फेला पारेपछि घरधनी र उक्त हतियार लुकाउन सहयोग गर्ने अन्य ३ लाई पक्राउ गरिएको रौतहट प्रहरी प्रमुख एसपी विनोद घिमिरेले बताएका छन् ।
आरोपीहरूमाथि हातहतियार सम्बन्धी मुद्दा दर्ता गरि कारबाही प्रक्रिया अगाडि बढाइएको जिल्ला प्रहरी कार्यालय रौतहटले जनाएको छ ।
