मुम्बई । हिन्दी सिनेमाका सुपरस्टार सलमान खान आजभोलि सामाजिक सञ्जालमा निकै सक्रिय देखिन थालेका छन्। उनका विभिन्न पोस्टहरू आएको दिन चर्चामा छाइरहन्छन्।

यसैबिच सोमबार अचानक सलमानको आधिकारिक इन्स्टाग्राम अकाउन्ट सस्पेन्ड भएपछि उनका प्रशंसकहरू निकै चिन्तित बनेका थिए। तर, केही समयको अन्तरालपछि उनको इन्स्टाग्राम ह्यान्डल पुनः सुचारु भएको छ।

भर्खरै मात्र प्यापराजीसँगको विवादपछि सलमानले ढिलो राति इन्स्टाग्राममा लगातार कयौँ पोस्टहरू सेयर गरेका थिए। यसअघि पनि उनी आफ्ना विभिन्न पोस्टका कारण चर्चामा रहने गर्थे। तर, सोमबारका दिन अचानक उनको इन्स्टाग्राम अकाउन्ट गायब भएपछि धेरैलाई अचम्ममा पारिदियो। उनको आधिकारिक पेज खोल्दा त्यहाँ ‘युजर नट फाउन्ड’ देखाइरहेको थियो।

केही समयपछि सलमानको आधिकारिक इन्स्टाग्राम पेज फिर्ता आयो र उनका पुराना पोस्ट तथा अन्य सबै विवरणहरू पुनः देखिन थाले। इन्स्टाग्राममा आएको प्राविधिक गडबडीका कारण यस्तो भएको बताइएको छ। पछिल्लो समय इन्स्टाग्रामले आफ्ना सर्त र नियमहरू पालना नगर्ने कयौँ ह्यान्डलहरूलाई सस्पेन्ड गरिरहेको छ।

इन्स्टाग्रामको सोही प्राविधिक त्रुटिका कारण सलमानको ह्यान्डल पनि केही समयका लागि निष्क्रिय भएको हुन सक्ने अनुमान गरिएको छ। हाल उनको पेज पूर्ण रूपमा सक्रिय भइसकेको छ। सलमान इन्स्टाग्राममा धेरै समय बिताउने गर्छन् र उनका नयाँ पोस्टहरू सधैँ चर्चाको विषय बन्ने गर्छन्। इन्स्टाग्राममा उनका फलोअर्सको सङ्ख्या ७ करोड २० लाखभन्दा बढी छ।