काठमाडौँ । आगामी प्रतिनिधिसभा निर्वाचनमा नेपाली कांग्रेसको नेतृत्व परिवर्तन गरेर जानुपर्ने अडानमा रहेका कांग्रेसका महामन्त्रीद्वय विश्वप्रकाश शर्मा र गगनकुमार थापा पछिल्लो समय एक्लिन थालेका छन् ।

सम्भव भए नियमित महाधिवेशन र त्याे सम्भव नभए विशेष महाधिवेशन गरेर भएपनि नयाँ सभापतिकाे नेतृत्वमा चुनावमा जानुपर्ने पक्षमा रहेका शर्मा र थापालाई पछिल्लो समय उनीहरू पक्षकै नेताहरूले साथ छाडेपछि एक्लिन थालेका हुन् ।

यस्तै सोमबार बसेको कांग्रेस केन्द्रीय कार्यसम्पादन समितिको बैठकले महामन्त्रीहरूले गरेको विषय महाधिवेशनको मागलाई बेवास्ता गर्नु र महाधिवेशन प्रतिनिधिहरूले हस्ताक्षर फिर्ता अभियान चलाउन थालेपछि महामन्त्रीहरूकाे विशेष महाधिवेशनकाे माग मधुर बन्दै गएकाे छ ।

नियमित महाधिवेशन गर्नुपर्ने पक्षमा रहेको कांग्रेस संस्थापन पक्षको आवाज बलियो हुँदै जाँदा र संस्थापन इतर समुहबाटै महामन्त्रीहरूले साथ पाउ छाडेका छन् । पहिला विशेष महाधिवेशन गरेर भएपनि नेतृत्व परिवर्तन गर्नुपर्ने आवाज उठाएकाे कांग्रेस संस्थापन इतर समूहका कतिपय नेताहरु अहिले नियमित महाधिवेशनमै जानुपर्ने पक्षमा उभिएका छन् ।

कांग्रेस इतर समूहका प्रभावशालि नेता डा. शेखर कोइराला पनि अहिले नियमित महाधिवेशनमै जानुपर्ने पक्षमा उभिएका छन् । उनले केन्द्रीय कार्यसमितिको बहुमतले गरेको निर्णय विरुद्ध जान नसकेको जनाउँदै कोइरालाले वैशाखमै नियमित महाधिवेशन गर्नुपर्ने पक्षमा उभिएका  छन् ।

यस्तै महाधिवेशनको विषयमा विवाद उत्पन्न भएपछि कांग्रेसका पाँच वटा प्रदेशका सभापतिले नियमित महाधिवेशनमै केन्द्रित हुन अपिल गरेका छन् । महामन्त्रीद्वय थापा र शर्माले अघि सारेको विशेष महाधिवेशनको औचित्य समाप्त भएको भन्दै नियमित महाधिवेशनमै केन्द्रित हुन उनीहरूको आग्रह छ ।

सोमबार संयुक्त विज्ञप्ति जारी गर्दै कोशीका सभापति उद्धव थापा, मधेसका सभापति कृष्णप्रसाद यादव, बागमतीका इन्द्रबहादुर बानियाँ, कर्णालीका ललितजंग शाही र सुदूरपश्चिमका वीरबहादुर बलायरले नियमित महाधिवेशनमै केन्द्रित हुन अपिल गरेका हुन् । उनीहरूले कांग्रेस केन्द्रीय कार्यसम्पादन समितिको बैठकमै संयुक्त विज्ञप्ति पेस गरेका हुन् ।