जनकपुरधाम । विवाहपञ्चमी महोत्सवको अन्तिम दिन जनकपुरधामस्थित जानकी मन्दिरले पहिलो पटक २१ जना सरसफाइकर्मीलाई विशेष सम्मान गरेको छ।
नेपाली कांग्रेसका नेता विमलेन्द्र निधिले बुधबार मन्दिर प्राङ्गणमै निर्माण गरिएको विवाहमञ्चमा जनकपुरधामको सरसफाइमा अहोरात्र खटिने सरसफाइकर्मीहरूलाई प्रमाणपत्र र दोसल्ला ओढाएर सम्मान गरेका हुन् ।
जानकी मन्दिरका उत्तराधिकारी महन्थ राम रोशन दास वैष्णवले यस किसिमको सम्मान कार्यक्रम हरेक वर्ष सञ्चालन गरिने बताए ।
सम्मानित सरसफाइकर्मीहरूले जीवनमै पहिलो पटक सार्वजनिक रूपमा सम्मानित हुँदा खुसी व्यक्त गरे ।
