जनकपुरधाम । जानकी मन्दिरमा विवाहपञ्चमी महोत्सवअन्तर्गत राम कलेवा विधि सम्पन्न भएपछि यो वर्षको विवाहपञ्चमी महोत्सव सम्पन्न भएको छ।

विवाहपछि मिथिलाञ्चलमा बेहुलालाई विभिन्न परिकार खुवाउने परम्परा रहेको छ। रामकलेवाका लागि राम सहित चारै भाइको प्रतीकको रूपमा रहेका बालक जानकी मन्दिरको प्राङ्गणमा बनाइएको मडवामा बसेर भोजन ग्रहण गरेका थिए।

राति विवाह भएकै मडवामा बसाएर चारै भाइलाई भोजन गराइयो। रामकलेवा विधि चलिरहेकै समयमा मैथिल नारीहरूले गीतकै माध्यमले राम, भरत, लक्ष्मण, शत्रुघ्न तथा अयोध्यावासीलाई गीतकै माध्यमले जिस्काएका थिए। चारै भाइका साथै अयोध्याबाट आएका जन्तीलाई समेत आदरका साथ भोजन गराइयो।

जन्ती तथा राजा दशरथलाई समेत गीत गाउने महिलाहरूले मैथिली परम्परानुसार लोकगीत डहकन गाएर गाली गरेका थिए। सो हास्यपरिहासको माहौलले जानकी मन्दिरको वातावरण अद्‌भुत बनाएको थियो। रामकलेवामा सहभागी जन्तीहरूलाई कपडा, प्रसाद आदि दिएर बिदाइ गरिएको छ।