नवलपुर — नदीजन्य पदार्थको अवैध उत्खनन् गरेको भन्दै पूर्वी नवलपरासीको कावासोतीबाट प्रहरीले तीन वटा ट्रिपर र एउटा एक्साभेटर नियन्त्रणमा लिएको छ ।
बुटवल-नारायणगढ सडक विस्तारको जिम्मा लिएको चाइना स्टेट कम्पनीले एक्साभेटर प्रयोग गरेर नदीजन्य पदार्थ उत्खनन् गर्दै गर्दा प्रहरीले नियन्त्रणमा लिएको हो ।
असार १ गतेबाट ठेक्का लागेका स्थानमा समेत उत्खनन् गर्न पाइदैन । तर चाइना स्टेटले खुलेयाम नदीजन्य पदार्थ चोरी गरिरहेको स्थानीयले गुनासो गरेपछि प्रहरीले सवारी नियन्त्रणमा लिएको हो ।
राजमार्गको पुल नजिकैबाट उत्खनन् गर्दा पुललाई समेत असर पर्ने भन्दै स्थानीयले गुनासो गर्दै आएका थिए । नियन्त्रणमा लिएका सवारीलाई प्रहरी चौकी डन्डामा राखिएको जिल्ला प्रहरी कार्यालय पुर्वी नवलपरासीका डिएसपी बेदबहादुर पौडेलले जानकारी दिए ।
जिल्लाका खहरे खोलाहरुमा नदीजन्य पदार्थको अवैध उत्खनन भएपनि स्थानीय तहले नियमन गर्न सकेका छैनन्।
