सिरहा । सिरहा नगरपालिकाले गर्मी बढेसँगै बिहान ९ बजेभित्रै पठनपाठन सकाउन विद्यालयहरुलाई निर्देशन दिएको छ ।
पालिका अन्तर्गत सञ्चालनमा रहेको सामुदायिक, संस्थागत तथा धार्मिक विद्यालयहरुलाई सिरहा नगरपालिकाले बिहानको ९ बजेसम्म मात्रै कक्षा सञ्चालन गर्न निर्देशन दिएका छन् ।
नगरपालिकाको जेठ २८ गतेको निर्णयानुसार यस क्षेत्रमा अत्यधिक गर्मी बढिरहेको र अझै केही दिन गर्मी बढ्न सक्ने मौसम विभागको पूर्वानुमानलाई मध्यनजर गर्दै पठनपाठन बिहानै सक्न निर्देशन दिएको हो । सिरहा नगरपालिकाका प्रमुख प्रशासकीय अधिकृत बलिराम यादवले बालबालिकाको स्वास्थ्यलाई ख्याल गर्दै बिहानै कक्षा सञ्चालन गराउन निर्देशन दिएको बताए ।
उनले पहिलो चरणमा मौसमलाई मध्यनजर गर्दै जेठ २९ गतेदेखि जेठ ३२ गतेसम्म बिहान ९ बजेसम्म कक्षा सञ्चालन गर्न निर्देशन दिइएको बताए ।
