प्रधानमन्त्री पुष्पकमल दाहाल ‘प्रचण्ड’ले इजरायलमा नेपालीको उद्धार गर्न नेपाल एयरलाइन्सको जहाज पठाउन भएको ढिलाइप्रति चासो राखेका छन् ।
जहाज पठाउन भएको ढिलाइबारे सम्बन्धित अधिकारीहरूलाई बोलाएर प्रधानमन्त्री छिटो गर्न निर्देशन दिएको प्रधानमन्त्रीको सचिवालयले जनाएको छ ।
‘प्रधानमन्त्रीले परराष्ट्रमन्त्रीसहितका सरोकारवालालाई बोलाएर इजरायलमा जहाज पठाउन भएको ढिलाइबारे जानकारी लिनुभएको छ । छलफलका क्रममा उपप्रधानमन्त्री एवं रक्षामन्त्री पूर्णबहादुर खड्का, परराष्ट्रमन्त्री एनपी साउद, मन्त्रालयका सचिव, प्रवक्ता, नेपाल नागरिक उड्डयन प्राधिकरणका महानिर्देशक प्रदीप अधिकारीसहितसँग प्रधानमन्त्रीले छलफल गरेको जानकारी प्रेस विज्ञ मनहरि तिमल्सिनाले दिए ।
‘नेपालीको उद्धारमा जहाज पठाउन किन ढिलाइ भएको भनेर प्रधानमन्त्रीले जानकारी लिन खोज्नुभएको थियो । छिटो जहाज पठाउन प्रधानमन्त्रीले निर्देशन दिनुभयो । सरोकारवालाहरूले ट्रान्जिट जहाजको उडानका लागि सम्बन्धित देशको अनुमति लिने प्रक्रियाले केही समय लागे पनि आजै राति जहाज पठाउने बताउनुभएको छ ।’
सोही छलफलपछि सरकारले आज राति ११ बजे नेपाल एयरलाइन्सको जहाज दुबई हुँदै इजरायलको तेलअभिव पठाउने जनाएको छ ।
जहाजमा नेपाल फर्किन चाहने नेपाली र हमासको आक्रमणमा मारिएका १० जनाको शव ल्याउने तयारी छ ।
