कोकिला भण्डारी, धनकुटा
धनकुटा । धनकुटाको साँगुरीगढी गाउँपालिका–४ फाक्सिवमा नवनिर्मित स्वास्थ्य चौकिको भवन सघन शहरी तथा भवन निर्माण आयोजना धनकुटाले साँगुरीगढी गाउँपालिकाका अध्यक्ष जितेन्द्र रूम्दाली राईलाई एक कार्यक्रमका विच हस्तान्तरण गरेको छ ।
उक्त भवन निर्माण कार्य सम्पन्न पश्चात अलपत्र अवस्थामा रहेको थियो । उक्त भवन सघन शहरी तथा भवन निर्माण आयोजना धनकुटाका आयोजना प्रमुख सुमन मिश्रले साँगुरीगढी गाउँपालिका अध्यक्ष जितेन्द्र राई र वडा कार्यालय प्रतिनिधिको रोहवरमा भवन हस्तान्तरण सम्बन्धी पत्र हस्तान्तरण गर्दै भवन हस्तान्तरण गर्नुभएको थियो ।
उक्त नवनिर्मित भवनमा ११ वटा कोठा र ४ वटा शौचालय रहेको भवन निर्माणको काम सम्पन्न गर्ने बिरुवा कन्स्ट्रक्सन प्राईभेट लिमिटेडले जनाएको छ ।
निर्माण कम्पनीले भवन निर्माणको केहि काम बाँकी राखेको हुदा धेरै पटक ताकेता गरेपछि निर्माण कम्पनीबाट काम सम्पन्न भए लगतै हस्तान्तरण गरिएको आयोजनाले जनाएको छ ।
पालिका अध्यक्ष राईका अनुसार नवनिर्मित भवन हस्तान्तरण नहुँदा जीर्ण स्वास्थ्य चौकीको भवनबाट सेवा सञ्चालन गर्नुपर्दा सेवाग्राहीलाई सेवा लिन र स्वास्थ्य कर्मीले सेवा दिन समस्या भएको थियो । भवन हस्तान्तरण भएसँगै स्वास्थ्य चौकीमा थप सेवा विस्तार हुने छ ।
उहाँले चालु आर्थिक वर्षभित्र सबै रुग्ण योजना सम्पन्न गरी हस्तान्तरणको प्रकृयामा जाने बताउनु भयो ।