काठमाडौं : सेयर बजारमा गिरावटको सिलसिला अझै पनि जारी रहेको छ । यस दिन नेप्से सूचक २७.९२ अंकले घटेर २०१०.०१ विन्दुमा आएको छ । १ अर्ब ८७ करोड रुपैयाँभन्दा बढीको सेयर कारोबार भएको छ । सूचकका साथमा खरिदबिक्री रकम पनि तल झरेको छ । घटेका बेला सबै ‘वेट एन्ड वाच’को अवस्थामा बस्दा दैनिक टर्नओभर पनि प्रभावित भएको हो । यतिबेला लगातार बजार किन घटिरह्यो भन्ने आम जिज्ञासा छ । तर यसको यकिन जवाफ विश्लेषकहरुले पनि दिन सकिरहेका छैनन् ।

सबैको सीधा र रेडिमेड उत्तर वित्तीय प्रणालीमा तरलता अभाव हो भन्ने नै रहेको छ । तरलता अभाव र चुलिएको ब्याजदरले सर्वसाधारणको आकर्षण कम भएको यथार्थता नै हो । तर तरलता अभाव झन्डै एक वर्षदेखिको समस्या हो । यसआधारमा यो मात्र कारण नभएको भन्नेहरु पनि उत्तिकै छन् । यतिबेला नेप्से घट्नुको कारण स्वभाविक करेक्सन हो भन्नेहरु धेरै छन् । किन भने करिब १ महिनाको अवधिमा सूचक करिब ४ सय अंकले बढ्यो । यसरी बढेको बजार अहिले स्वभाविक करेक्सनमा गएको अनुमान गरिएको छ । अब यो करेक्सन चरण सकिएपछि नेप्से फेरि बाउन्स ब्याक हुनेछ ।

सेयर बजारका लागि यतिबेला माहोल धेरै हिसाबले सकारात्मक बन्दै गएको छ । २५ लाखसम्मको सेयर धितो कर्जामा जोखिभार घटाइनु, बैंकहरुले तत्काल ब्याजदर नबढाउने घोषणा गर्नु पनि बजारका लागि सकारात्मक पक्ष हुन् । यस्तै, लाभांशको सिजन सुरु भएको छ । कम्पनीहरुको औसत नाफा वृद्धि भएकाले लाभांश अनुपात पनि वृद्धि हुने देखिन्छ । यी परिदृश्यहरुमा सबल वित्तीय सूचक भएका कम्पनीहरुमा योजनाबद्ध र दीर्घकालीन हिसाबले लगानी गर्न सके लाभ लिन सकिने सम्भावना रहने अनुभवीहरु बताउँछन् ।

सेयर बजारमा लगानीकर्ताको मनोविज्ञानको सबैभन्दा बढी भूमिका रहने गर्छ । यसआधारमा आम लगानीकर्ताको मनोविज्ञान सकारात्मक हुनुपर्छ । बजार घटबढ गरिन्छ भन्ने बिर्सिनु हुन्न् । घटेको बजार फेरि माथि जाने भएकाले सोही अनुसार लगानीसम्बन्धी रणनीति तय गर्न विश्लेषकहरुले सुझाव दिने गरेका छन् ।

यस दिन २२७ कम्पनीको ४५ लाख ५९ हजारभन्दा बढी कित्ता सेयर कारोबार भएको छ । सबै उपसमूहका सूचक राता भएका छन् । १६ करोड ५३ लाख रुपैयाँभन्दा बढीसहित कारोबार रकममा हिमालयन डिष्टिलरी अग्रस्थानमा रहेको छ । यसैगरी, दोस्रो र तेस्रो स्थानमा क्रमशः नेपाल लाइफ इन्सुरेन्स र शिवम् सिमेन्ट्स परेका छन् ।