काठमाडौं । बेथिति र भ्रष्टाचारविरुद्ध निरन्तर खबरदारी गर्दै आएका रहबर अन्सारी बारा–४ बाट राष्ट्रिय स्वतन्त्र पार्टी (रास्वपा)का तर्फबाट ४१ हजार २०० मतसहित प्रतिनिधिसभा सदस्यमा निर्वाचित भएका छन्।
२०६६ सालमा माओवादी राजनीतिमा प्रवेश गरेका अन्सारी निर्वाचनको मुखमै नेकपा त्यागेर रास्वपामा प्रवेश गरेका थिए। यसअघि २०७९ सालको निर्वाचनमा उनी पर्सा निर्वाचन क्षेत्र नम्बर–१ (क) बाट प्रदेशसभा सदस्यमा माओवादी केन्द्रका तर्फबाट विजयी भएका थिए।
२०७४ सालको स्थानीय तह निर्वाचनमा उनले वीरगञ्ज महानगरपालिकाको मेयर पदमा उम्मेदवारी दिएका थिए। सोही वर्ष प्रदेशसभा सदस्यमा पनि उनले प्रतिस्पर्धा गरेका थिए। २०८२ साल पुस २४ गते अन्सारीले नेकपा परित्याग गर्दै पार्टीबाट औपचारिक रूपमा राजीनामा दिएका थिए।
२०४३ साल वैशाख १५ गते काठमाडौंमा जन्मिएका अन्सारीले स्नातकोत्तर तहसम्म अध्ययन गरेका छन्। उनले भारतको सिम्बायोसिस इन्टरनेशनल युनिभर्सिटीबाट बीबीए र हंगेरीस्थित सेन्ट्रल युरोपियन युनिभर्सिटीबाट पब्लिक पोलिसीमा मास्टर्स गरेका छन्।
राजनीतिसँगै अन्सारीसँग निजी क्षेत्रको कार्यकारी अनुभव पनि छ। उनले सन् २००९ देखि २०१६ सम्म वीरगञ्जस्थित गण्डक अस्पताल प्रालिको प्रमुख कार्यकारी अधिकृत (सीईओ) का रूपमा काम गरेका थिए। यसबाहेक रोटरी क्लब वीरगञ्जमा निर्देशक, सचिव तथा जनसम्पर्क निर्देशकको जिम्मेवारी पनि सम्हालेका थिए।
अन्सारी अन्तर्राष्ट्रिय विकास कार्यक्रम र युवा नेतृत्वसम्बन्धी गतिविधिमा पनि सक्रिय रहँदै आएका छन्। मधेश प्रदेश सभाका सदस्य रहँदा उनले उद्योग, पर्यटन तथा वन राज्यमन्त्रीको जिम्मेवारीसमेत सम्हालेका थिए।
राजनीति र समाजसेवामा सक्रिय अन्सारीले सुशासन, विकास, शिक्षा, पर्यावरण र धार्मिक सहिष्णुताको पक्षमा सदनदेखि सडकसम्म आवाज उठाउँदै आएका छन्। स्पष्ट वक्ता, इमानदारी र सक्रियताका कारण उनी जिल्लावासीमाझ विश्वासिला युवा नेताका रूपमा परिचित छन्।
राजनीतिलाई सत्ता प्राप्तिको साधनभन्दा सेवा गर्ने माध्यमका रूपमा हेर्ने उनको दृष्टिकोण रहेको छ। २०८१ सालतिर सिमेन्टको मूल्य अस्वाभाविक रूपमा बढ्दा होस् वा कोभिड–१९ महामारीका बेला बैंक तथा वित्तीय संस्थाहरूले व्यवसायी तथा सर्वसाधारणमाथि दबाब सिर्जना गर्दा होस्, उनले सक्रिय रूपमा आवाज उठाएका थिए। करको विरोधमा २५ जना कार्यकर्तासहित अर्धनग्न भएर प्रतीकात्मक आन्दोलनमा उत्रिएर पनि उनले चर्चा बटुलेका थिए।
गत ५ माघमा प्रदेशसभामा दिएको अभिव्यक्तिले पनि राष्ट्रियस्तरमा तरंग ल्याएको थियो। उनले मधेश प्रदेशलाई ‘भ्रष्टाचारीहरूको रेडलाइट एरिया’ घोषणा गर्नुपर्ने अभिव्यक्ति दिएका थिए। उनका अनुसार मधेश प्रदेशमा बढ्दो भ्रष्टाचारले विकास र सुशासनमा अवरोध सिर्जना गरेको छ।
नेकपा छाड्दा अध्यक्ष पुष्पकमल दाहाललाई सम्बोधन गरेर लेखिएको उनको पत्रले पनि राजनीतिक वृत्तमा चर्चा पाएको थियो।
स्वभावले शान्त तर व्यवहारमा विद्रोही छविका अन्सारीको अब भूमिका र जिम्मेवारी फेरिएको छ। स्थानीय तह र प्रदेश हुँदै संघीय संसदसम्म पुगेका उनी अब सडकमा उठाएका मुद्दालाई नीतिगत रूपमा सम्बोधन गर्ने तहमा पुगेका छन्।
अब विद्रोहभन्दा परिणाम दिनुपर्ने जिम्मेवारी उनको काँधमा आएको छ।
