बारा । नेकपा एमालेका कार्यकर्ता र जेन–जी समूहका युवाबीच बुधबार भएको झडपका कारण बारा सिमरा बिहीबार पनि अशान्त बनेको छ ।

आज पनि विरोध प्रदर्शनी गर्दै युवाहरु सडकमा निस्किएका छन् । प्रहरी प्रशासन र युवाहरुबीच बुधबार बेलुका भएको सहमति पश्चात सडक सञ्चालनमा आए पनि आज बिहानैबाट सो क्षेत्रको वातावरण अशान्त बन्दै गएको छ ।

एमालेका नेताहरू महासचिव शंकर पोखरेल र पोलिटव्युरो सदस्य महेश बस्नेत बुधबार सिमरा जाने थाहा पाएका जेन–जी युवाले सिमरा विमानस्थलमा नाराजुलुस गरेसँगै विमानस्थल नै बन्द गरिएको थियो ।

नेताहरु काठमाडौँबाट जानै पाएका थिएनन् । जेन–जी युवाले विरोध गरेपछि त्यसको प्रतिकारमा बारा एमाले निस्किएको थियो ।

जसका कारण बुधबार स्थानीय प्रशासनले कर्फ्यु लगाएको थियो । सहमतिपछि बुधबार बेलुका शान्त भएको सिमरा बिहीबार फेरि अशान्त बनेको छ ।

यसको पछाडि कुन समूहको हात छ भन्ने खुलेको छैन । एमालेका केही नेताहरुले माओवादी नेताहरुको हात रहेको आरोप लगाएका छन् । खुलुेर भने कोही आएका छैनन् ।

यता यो घटनाको चौतर्फी विरोध भइरहेको छ । सरकारले फागुन २१ गते प्रतिनिधि सभाको निर्वाचन गराउन खोज्ने तर नेताहरु यात्रा गर्ने वातावरणसमेत नबनाएको भन्दै सरकारको आलोचना भएको छ ।

यसैबीच प्रधानमन्त्री सुशीला कार्कीले लोकतन्त्रमा सिमरा घटना सहनयोग्य नहुने भन्दै त्यस्तो दुस्कर्म नगर्न चेतावनी दिएकी छिन् ।

यो चेतावनीबीच पनि सिमरा भने अशान्त रहेको छ ।