२०४६ साल भदौमा सिरहामा बसेको नेकपा एमालेको (तत्कालीन माले) चौथो महाधिवेशनले मदन भण्डारीलाई महासचिव निर्वाचित गरेकै स्थानमा केन्द्रीय सचिवालय बैठक बस्दै छ । त्यसका लागि एमालेका १९ जना नेताहरू सिरहा पुगेका छन् ।
इतिहासलाई स्मरण र अग्रजलाई सम्मान गर्ने हेतुले एमालेले यस पटक सिरहाको सर्रे अम्वासमा सचिवालय बैठक राखेको उपमहासचिव विष्णु रिमालले बताए । ३४ वर्षअघि सोही स्थानमा भूमिगत रूपमा सम्पन्न चौथो महाधिवेशनले मदन भण्डारीलाई महासचिवमा निर्वाचित गरेको थियो । महाधिवेशनले भण्डारीको नेतृत्वमा २० सदस्यीय नयाँ कार्यसमिति चयन गरेको थियो ।
जसमा पाँच जना पोलिटब्युरो सदस्य थिए भने १४ जना केन्द्रीय सदस्य थिए । जसमा चार जना वैकल्पिक केन्द्रीय सदस्य निर्वाचित भएका थिए । त्यसबेलाका २० केन्द्रीय सदस्यमध्ये माधव नेपाल र झलनाथ खनाल एमालेबाट छुट्टिएर नेकपा एकीकृत समाजवादी पार्टी गठन गरेका छन् भने मदन र जीवराज आश्रित दासढुंगा दुर्घटनामा निधन भैसकेका छन् ।
त्यस्तै राधाकृष्ण मैनाली हाल कुनै पार्टीमा छैनन् भने सिपी मैनाली नेकपा मालेका महासचिव छन् । मुकुन्द न्यौपाने र केदार न्यौपाने एकीकृत समाजवादीबाट पुन एमालेमै फर्किएका छन् । एमालेमै रहेका अर्का नेता मोदनाथ प्रश्रित एमालेको सक्रिय राजनीतिमा छैनन् । त्यस्तै त्यसवेलाका केन्द्रीय सदस्य अशोक राई हाल जसपाका नेता छन् । चौथो महाधिवेशनमा निर्वाचित २० नेता मध्ये निधन भएका र अन्य पार्टीमा गएका गरी ६ जना नेताबाहेक अरू सबै एमालेमै रहेका छन् ।
१. मदनकुमार भण्डारी महासचिव (निधन)
२. माधवकुमार नेपाल, पोलिटब्युरो (नेकपा एकीकृत समाजवादी)
३.जीवराज आश्रित,पोलिटब्युरो (निधन)
४. झलनाथ खनाल,पोलिटब्युरो (हाल नेकपा एकीकृत समाजवादी)
५. अमृत बोहरा -पोलिटब्युरो
६.चन्द्रप्रकाश मैनाली -पोलिटब्युरो (माले)
७. मुकुन्द न्यौपाने -केन्द्रीय सदस्य
८. प्रदीप नेपाल -केन्द्रीय सदस्य
९. ईश्वर पोखरेल -केन्द्रीय सदस्य
१०. वामदेव गौतम -केन्द्रीय सदस्य
११. मोदनाथ प्रश्रित -केन्द्रीय सदस्य
१२. खड्गप्रसाद ओली -केन्द्रीय सदस्य
१३. अशोक राई -केन्द्रीय सदस्य (हाल जसपा)
१४. युवराज ज्ञवाली -केन्द्रीय सदस्य
१५. त्रिलोचन ढकाल -केन्द्रीय सदस्य
१६. राधाकृष्ण मैनाली -केन्द्रीय सदस्य
१७. केदार न्यौपाने -केन्द्रीय सदस्य
१८. केशव बडाल -केन्द्रीय सदस्य
१९. युवराज कार्की -केन्द्रीय सदस्य
२०. गोपाल शाक्य -केन्द्रीय सदस्य
