काठमाडौं । क्युबाको समुद्री सीमामा तीव्र गतिको डुङ्गा (स्पिडबोट) लाई नियन्त्रणमा लिने क्रममा क्युबाली अधिकारीहरूले गोली चलाउँदा कम्तीमा एक जना अमेरिकी नागरिकको मृत्यु भएको छ। बुधबार भएको यस घटनामा अन्य केही व्यक्ति घाइते भएका छन्।

फ्लोरिडामा दर्ता भएको उक्त डुङ्गामा सवार १० जनामध्ये चार जनाको मृत्यु भएको र बाँकी ६ जना घाइते भएको अमेरिकी अधिकारीहरूले पुष्टि गरेका छन्। घाइतेमध्ये एक जना अमेरिकी नागरिककी मङ्गेतरसमेत रहेको बताइएको छ।

क्युबा सरकारले यस घटनालाई आतङ्ककारी घुसपैठको प्रयासको संज्ञा दिएको छ। क्युबाली आन्तरिक मन्त्रालयका अनुसार उक्त डुङ्गा क्युबाको उत्तरी तटबाट एक नटिकल माइल भित्र छिरेको थियो।

क्युबाको दाबी अनुसार डुङ्गामा सवार व्यक्तिहरूले पहिले गोली चलाएका थिए र त्यसपछि भएको दोहोरो भिडन्तमा क्युबाली कमान्डर समेत घाइते भएका छन्। क्युबाका राष्ट्रपति मिगुएल डियाज–कानेलले आफ्नो देशको सार्वभौमसत्ता र स्थिरतामा आँच पुर्‍याउने कुनै पनि आतङ्ककारी वा भाडाका सैनिकको आक्रमण विरुद्ध दृढतापूर्वक उभिने बताएका छन्।

अमेरिकी विदेशमन्त्री मार्को रुबियोले यस घटनालाई ‘अत्यन्तै असामान्य’ भन्दै वासिङ्टनले यसबारे गम्भीर अनुसन्धान गरिरहेको बताएका छन्। उनले यस अभियानमा अमेरिकी सरकार वा सुरक्षाकर्मीको कुनै संलग्नता नरहेको प्रष्ट पारेका छन्। यता क्युबाली अधिकारीहरूले भने डुङ्गामा सवार सबै १० जना अमेरिकामा बसोबास गर्ने क्युबाली नागरिक भएको र उनीहरूमध्ये अधिकांशको आपराधिक रेकर्ड रहेको दाबी गरेका छन्। घटनास्थलबाट ह्यान्डगन, असल्ट राइफल र विष्फोटक पदार्थ समेत बरामद गरिएको क्युबाले जनाएको छ।

यो घटना यस्तो समयमा भएको छ जब अमेरिका र क्युबाबिचको सम्बन्ध निकै तनावपूर्ण अवस्थामा छ। करिब दुई महिना अघि अमेरिकी सेनाले क्युबाको निकट सहयोगी मानिने भेनेजुएलाका नेता निकोलस मादुरोलाई नियन्त्रणमा लिएपछि दुई देशबिचको दूरी झन् बढेको थियो।

अमेरिकी राष्ट्रपति डोनाल्ड ट्रम्पले क्युबालाई ‘सम्झौता गर्न वा परिणाम भोग्न’ चेतावनी दिँदै आएका छन्। विशेषगरी भेनेजुएलाबाट क्युबा जाने तेल आपूर्तिमा अमेरिकाले लगाएको प्रतिबन्धका कारण टापु राष्ट्र क्युबामा इन्धनको चरम अभाव छ।

रोचक कुरा के छ भने, यो हिंस्रक घटना भएकै दिन अमेरिकी अर्थ मन्त्रालयले क्युबाली जनतालाई मानवीय सहायता पुर्‍याउने उद्देश्यले निजी क्षेत्रका केही ससाना कारोबार र तेल बिक्रीमा लगाइएको प्रतिबन्ध केही खुकुलो पार्ने घोषणा गरेको थियो। तर, समुद्रमा भएको यो रक्तपातपूर्ण घटनाले सुधार हुन खोजेको सम्बन्धलाई फेरि अन्योलमा धकेलिदिएको छ।

३० वर्षअघि पनि क्युबाले दुईवटा साना अमेरिकी विमान खसाल्दा चार जनाको मृत्यु भएको थियो, जसले दुई देशबिच ठूलो कूटनीतिक सङ्कट निम्त्याएको थियो।