समूह ‘ए’ को विजेता हुँदै नेपाल क्वार्टरफाइनलमा प्रवेश
१९औँ एसियन खेलकुद प्रतियोगिताअन्तर्गत नेपालले आइतबार माल्दिभ्सलाई एक सय ३८ रनले हराएको छ । समूह ‘ए’ को विजेता हुँदै नेपाल क्वार्टरफाइनलमा प्रवेश गरेको छ ।
झेजियाङ युनिभर्सिटी अफ टेक्नोलोजी पिङफियाङ क्रिकेट फिल्डमा टस जितेर पहिले ब्याटिङ गरेको नेपालले २० ओभरमा सात विकेट गुमाएर २ सय १२ रन जोड्यो । प्रत्युत्तरमा माल्दिभ्स १९.४ ओभरमा ७४ रनमात्र बनायो । नेपालका लागि कप्तान रोहित पौडेलले अर्धशतकीय इनिङ्स खेलेका थिए । उनले २७ बलमा समान तीन चौका र छक्काको मद्दतमा ५२ रन जोडे ।
यसैगरी अलराउन्डर गुल्सन झाले २१ बलमा ३५ रन बटुले । उनले एक चौका र तीन छक्का प्रहार गरे । अघिल्लो खेलमा मंगोलियाविरुद्ध शतकीय रुपमा विश्वकीर्तिमान बनाएका कुशल मल्लले ४७ रनमा नटआउट रहे । उनले २० बलमा समान तीन चौका र छक्का हिर्काएका थिए ।
नेपालका ओपनर कुशल भुर्तेलले एलबिडब्लूको धरापमा पर्नुअघि १८ बलमा पाँच चौका र एक छक्काको मद्दतमा ३५ रन जोडे । ओपनर आसिफ शेख ६ रनमै आउट भएका थिए । लामो समयपछि नेपाली टोलीा स्थान बनाएका विनोद भण्डारी १५ बलमा १३ रन बनाए । यसैगरी, सन्दीप जोरा ५ रन र दीपेन्द्रसिंह ऐरी ६ रनमा आउट भए ।
नेपालको ब्याटिङमा पहिलो विकेटका लागि २.३ ओभरमा २० रनको साझेदारी भएको थियो । यसैगरी दोस्रो विकेटका लागि ३४ रनको साझेदारी भयो । चौथो विकेट निमित्त ६७ रन र छैटो किेटका लागि ६० रनको साझेदारी भयो ।
बलिङमा नजवान इमैलले चार ओभरमा १७ रन खर्चेर तीन विकेट लिए । यसैगरी मोहमद रायाले १२ रनमा एक विकेट हात पारे । सिमर नासेर इमैलले तीन ओभरमा २३ रन खर्चेर एक विकेट लिए । मोहमद मिभानले ४२ रन खर्चेर एक विकेट लिए ।
