सामाजिक कार्यमा क्लोथ बैंकको अग्रणी भूमिका

सामाजिक कार्यमा क्लोथ बैंकको अग्रणी भूमिका

अपन दैनिक
जेठ ७, २०७८ मा प्रकाशित
१७३ पटक पढिएको
सामाजिक कार्यमा क्लोथ बैंकको अग्रणी भूमिका

क्लोथ बैंक नेपाल कोरोना महामारीमा कस्तो भूमिका निर्वाह गर्दैछ ?
सामाजिक कार्यमा अग्रणी भूमिका निर्वाह गर्ने उद्देश्यका साथ यो क्लोथ बैंक नेपाल स्थापना भएको हो । नयाँ लुगा संकलन गरेर विपन्न, असहायहरुलाई वितरण गर्ने उद्देश्यका साथ हामीले क्लोथ बैंकको सुरुवात गरेका थियौं । त्यसपछि आफ्नो कार्य क्षेत्रलाई विस्तार गर्दै नेपालमा आइपरेको आपत–विपत् अथवा दैवी प्रकोपमा परेकाहरुलाई सहयोग गर्दै आफ्नो दायरा बढाउँदै गयौं । गत वर्षदेखि नेपालमा कोरोना महामारी सुरु हुँदा क्लोथ बैंकले चिकित्सकहरुको एउटा टिम बनाएर होम आइसोलेसनमा बस्नेहरुलाई निःशुल्क चिकित्सकीय सल्लाह, सुरक्षा सामग्रीहरु र निःशुल्क औषधि उपलब्ध गराउँदै आएको छ । हामीले अक्सिजन बैंकको पनि स्थापना ग¥यौं, निःशुल्क उपलब्ध गराउँदै आएका छौं ।
तीव्रगतिमा कोरोना फैलिरहँदा कसरी सेवा दिइरहनुभएको छ ?
क्लोथ बैंकले निःशुल्क चिकित्सकीय परामर्श, औषधि लगायतका सामग्रीहरु वितरण गरिरहेको छ । हामीले गर्ने गरेको कामहरुबारे जनस्तरसम्म सूचना गइसकेको छ । हामीले दिनहुँ यस्ता सेवाहरु विस्तार गर्दै गएका छौं । हामीले गाउँसम्म नै चिकित्सक र स्वास्थ्य सामग्री पठाउँदै आएका छौं । हामी यो सम्वाद गरिरहँदा पनि एक जना दलित समुदायका वडाअध्यक्षको अवस्था गम्भीर हुँदा स्वास्थ्य सामग्रीसहित चिकित्सक पठाएका छौं । तर हामीसँग सीमित साधनस्रोत छन् । यो सीमित साधनस्रोतबाट नै उपचारबाट वञ्चित असहाय तथा विपन्नहरुको सेवा गरिरहेका छौं । होम आइसोलेसनको अवधारणा हाम्रो क्लोथ बैंक नेपालले नै ल्याएको हो । यस्तै अक्सिजन बैंक स्थापना गर्ने अवधारणा पनि सुरुमा हामीले नै ल्यायौं र त्यो अहिले विभिन्न ठाउँहरुमा भइरहेका छन् । यस्ता कार्यहरुमा राज्यले अग्रसरता लिनुपर्छ । किनभने राज्यसँग धेरै साधनस्रोतहरु हुन्छ ।
यदि राज्यले अग्रसरता लियो भने कोरोनाका कारण औषधि उपचार नपाएर एउटा पनि विरामीको ज्यान जाँदैन । इमान्दारीका साथ सक्रिय भएर यो महामारीसँग लड्ने प्रयास राज्यबाट नै भयो भने हामी नियन्त्रण गर्न सक्छौं ।
मुलुकमा अहिले तीन तहको सरकार छ, कस्तो भूमिका पाउनुहुन्छ ?
मुलुकमा तीन तहको सरकार हुँदा पनि महामारीमा सन्तोषजनक उपस्थिति छैन । स्वास्थ्य, शिक्षा र रोजगारको जिम्मा राज्यको हुन्छ । यहाँको स्वास्थ्य क्षेत्रको यस्तो भयावह अवस्था छ कि मान्छे विरामी पर्दा अस्पताल जान पनि डराउँछन् । कतिपय सर्वसाधारणसँग उपचारका लागि पैसा पनि हुँदैन । यस्तो अवस्थामा राज्यले आफ्नो जिम्मेवारी बहन नगर्नु दुःख हो । तीनै तहको सरकार महामारी रोकथाम तथा नियन्त्रणमा पूर्णरुपमा असफल साबित हुँदैछन् ।
यस्तो महामारीका बेला पनि जनता राज्यविहीनताको अवस्थामा छन् त ?
राज्यलाई जनतासँग कर लिनुबाहेक अन्य कुराको मतलब छैन । यस्तो बेला पनि भ्रष्टाचार चरम सीमामा पुगेको छ । विश्वमै सबभन्दा बढी भ्रष्टाचार नेपालमा भइरहेको छ । कतिपय जनप्रतिनिधिहरु कमिशनको खेलमा लागेका छन् । यो कुरा राज्यकै निकायबाट सार्वजनिक भएको छ । अस्ति भर्खरै स्वास्थ्य मन्त्रालयले भन्यो कि कमिशन नदिँदा खोप ल्याउन सकिएको छैन । राज्यले आफ्नो जिम्मेवारी बहन नगरेर जनतालाई आफ्नै नियतिमा छोडिदिएको छ । जनता अहिले भगवान भरोसे बाँचिरहेका छन् । बिना कमिशन सामान्य प्रयास पनि भइरहेको देखिँदैन ।
दिनप्रति दिन कोरोना बढ्दैछ, लकडाउन पनि जारी नै छ । तैपनि कोरोनाको चेनब्रेक किन भइरहेको छैन ?
विश्व स्वास्थ्य संगठनले जारी गरेको स्वास्थ्य मापदण्ड कडाइका साथ कार्यान्वयन नहुँदा कोरोनाको चेनब्रेक भइरहेको छैन । मान्छेबाट मान्छेमा तीव्रगतिमा सर्ने रोग हो । यसको चेनब्रेक गर्ने एउटा माध्यम हो लकडाउन । मान्छेहरुले कडाइका साथ यसलाई पालना नगरिदिँदा यस्तो भयावह अवस्था हुँदैछ । स्वास्थ्य क्षेत्रमा राज्यको प्रभावकारी उपस्थिति पनि नदेखिएको हो । राज्यका संयन्त्रहरु चुस्तदुरुस्त हुनुपर्छ । यो कोरोना महामारीसँग लडिरहेका सम्पूर्ण स्वास्थ्य क्षेत्रका योद्धाहरुलाई राज्यले प्रोत्साहन र सम्मान गर्नुपर्छ । यस्तो अवस्थामा पनि राज्यबाट नै स्वास्थ्य क्षेत्रमा क्रियाशीलहरु हतोत्साहित भइरहेका छन् । स्वास्थ्य क्षेत्रका योद्धाहरुलाई हतोत्साहित गर्ने काम बन्द गर्नुपर्छ । अस्पतालका चिकित्सक तथा कर्मचारीहरुमाथि हातपात जस्ता कार्यहरु भइरहेका छन् । यस्ता कार्यहरुको नियन्त्रण हुनुपर्छ ।
क्लोथ बैंकको स्रोत के हो ? कसरी व्यवस्थापन गर्दै हुनुहुन्छ ?
हामीले निःशुल्करुपमा गर्दै आएको सामाजिक कार्यमा कुनै पनि तहको सरकारबाट सहयोग पाएका छैनौं । बरु हामीले प्रदेश २ को सरकारलाई पत्र लेखेर मास्क, सेनिटाइजर र अक्सिमिटर माग गर्दा पनि कुनै सहयोग पाएनौं । हाम्रो स्रोत भनेको संस्थाका सदस्य, शुभचिन्तक, जनकपुरधामका मनकारी व्यक्तिहरु, संघसंस्थाहरु छन् । हामीलाई धेरै पैसाको आवश्यकता पनि छैन । हामीलाई एमआए संस्थाले अलिकति औषधि उपलब्ध गराइदियो । यहाँका जनता, व्यवसायी र शुभचिन्तकहरुलाई धन्यवाद दिन चाहन्छौं । उनीहरुको सहयोगमा हामीले असहाय तथा गरीब जनताहरुलाई सेवा गर्न पाएका छौं । हाम्रो संस्थाका सदस्यहरु आफ्नो पैसा लगाएर, ज्यान जोखिममा राखेर दिनरात एक गरेर काम गरिरहेका छन् ।
क्लोथ बैंकलाई अन्य के–के सहयोग भइदिए राम्रो हुन्थ्यो ?
सीमित स्रोतसाधनबाट हामी आफ्नो स्तरबाट गरिरहेकै छौं । हामीसँग प्रविधि र चिकित्सकहरुको टोली पनि छ, राज्यले हामीसँग समन्वय र सहकार्य गरेर गर्न सकियो भने अझ प्रभावकारी ढंगले बढीभन्दा बढी सर्वसाधारणसम्म सेवा सुविधा पु¥याउन सकिन्छ । हामीले प्रदेश २ का मुख्यमन्त्री समक्ष प्रस्ताव राखेका थियौं, उहाँले आश्वासन पनि दिनुभएको थियो तर काम अगाडि बढेन । केन्द्र सरकारको प्रतिनिधि सिडियो साहेब हुनुहुन्छ, उहाँको सहयोग पाएकै छौं ।
प्रदेश २ सरकारको भूमिका कस्तो छ त ?
कुनै पनि प्रदेश सरकारले प्रभावकारीरुपमा आफ्नो उपस्थिति देखाउन सकेको छैन । समग्रमा तीनवटै सरकारको भूमिका प्रभावकारी छैन । त्यसबाट जनता सन्तुष्ट हुने अवस्था छैन ।
क्लोथ बैंकको तर्फबाट के आह्वान गर्न चाहनुहुन्छ ?
कुनै पनि आपत–विपत्का बेला क्लोथ बैंक सदैव पीडितको साथ हुन्छ र सबै साथ पनि हामीलाई चाहिएको छ । कतिपयले हाम्रो यस संस्थाप्रति भ्रम छर्ने काम पनि गरिरहेका छन्, त्यो भ्रममा नपर्न आग्रह गर्दछु । हामी पीडितहरुको साथमा छौं । यो संस्था प्रचारबाजी गरेर वा कुरा मात्रै गरेर जनतामाझ लोकप्रिय भएको छैन । हामी काम गरेर देखाइरहेका छौं । सभार ः मधेशवाणी

छापा संस्करण

२०७८ असार १ मंगलवार

तपाईको सूचनाको तिर्खा मेट्न अपन दैनिक डट कममा ताजा र खोजमूलक समाचार (अपन दैनिक इ–पेपर) निरन्तर सम्प्रेषण गर्दै जानेछ । राष्ट्रियता, लोकतन्त्र, नागरिक अधिकार, सुशासन र प्रेस स्वतन्त्रताका सवालमा अपन दैनिकले कहिल्यै कसैसँग सम्झौता गर्ने छैन ।

  • वेबसाईट: www.apandainik.com
  • ईमेल: [email protected]
  • फोन नम्बर: ९७७–०३३–५२१२१४
  • ठेगाना: सिरहा नगरपालिका वाड नम्बर ७, (जिल्ला– सिरहा प्रदेश नम्बर २ नेपाल)

प्रेस काउन्सिल दर्ता नं.: १०३५/०७५-०७६
जिल्ला प्रशासन सिरहा दर्ता नं.: ९०/०७१-०७२
पान नं. ६०२७९७३८६

  • प्रकाशक: शुभ नारायण कामती (9854021739, 9801321739)
  • विज्ञापनका लागि सम्पर्क: रुन्केश कामती (9852821214)

Copyright © 2016 / 2021 - अपन दैनिक - सर्वाधिकार सुरक्षित